РУСКИ КЕРЕСТУР – По вчера обявених резултатох компютерского розподзельованя школярох осмакох до жаданих штреднїх школох, до керестурскей Штреднєй школи „Петро Кузмяк” на три напрями розпоредзени 50 школяре. Упис до школох нєшка и на ютре.
До ШШ „Петро Кузмяк” до Ґимназиї на руским язику, розпоредзени 10 школяре, осмеро з Керестура и двойо з Коцура, до сербского оддзелєня Ґимназиї 19 школяре найвецей з Кули, а на напрям туристични технїчар 21 школяр зоз скоро цалого заходнобачкого округу.
Иншак, 47 керестурски маломатуранти ше найвецей опредзелєли на ИТ сектор и на транспортни напрям и то до штреднїх школох у Кули дзе на ИТ сектор розподзелєни 11 школяре и 5 до економскей, потим 10 школяре розпоредзени до новосадских школох, тиж найвецей на информатични и транспортни напрями, а 4 школяре до Зомбора, 3 до Червинки, 2 до Суботици, 2 до Оджаку.
Такой нєшка почал и упис школярох до штреднїх школох до хторих су розпоредзени, а увидзи ше чи ше шицки так и упишу. Нєшка почал упис и до ШШ „Петро Кузмяк” як и до Дому школярох хтори понука 70 места.