Ютре у Керестуре почина 50. Драмски мемориял

автор маф
796 Опатрене

РУСКИ КЕРЕСТУР – На ютре, 16. марца, почина ювилейни 50. Драмски мемориял Петра Ризнича Дядї, смотра драмскей творчосци при Руснацох, на котрей по 24. марец буду виведзени 5 представи за старших, од хторих три по руски, и 6 дзецински представи.

Мемориял отвори домашнї РНТ „Петро Ризнич Дядя” зоз представу „Ковалє” Милоша Николича, 17. марца представу „Жени” Алда Николая виведзе Драмски студио „Арт” Дому култури Руски Керестур, а 18. марца на шоре представа „Кральова драга” Лилияни Иванович, витворенє у копродукциї Шабацкого театра зоз Шабцу и Театру „Ирена Колесар” зоз Сримскей Митровици.

Штварта представа за старших на Мемориялє будзе „Бабушка” Звонимира Павловича Руского културного центру з Нового Саду виведзена 23. марца, а остатнї дзень, 24. марца, наступи Културни центер Кула з представу „Родолюбци” Йована Стериї Поповича.

На тогорочним Мемориялу буду виведзени вкупно шейсц дзецински представи. Перша представа, уж такой на пияток, 16. марца, будзе „Дзивчатко и жобрак” Людмили Шандаловей Етно клубу „Одняте од забуца” з Коцура. Представа „Лєнїва Марча” Михала Нярадия Етно-клубу „Одняте од забуца” и Месного одбору Рускей матки на репертоару 19. марца, а ютредзень на шоре „Планета Норим” Мирона Канюха КУД „Тарас Шевченко” з Дюрдьова. На стреду, 21. марца, будзе представа „Кудлик, пудлик чека ґазду” Миколи Шанти спред КУД „Жатва” з Коцура, 22. марца „Нєлапшни Алибаба” Тодета Николетича КУД „Дюра Киш” зоз Шиду, а 23. марца представу „Цифровани яблука” Ивани Деспотович виведзе домашнї Драмски студио „Арт”.

Вечарши представи починаю на 19,30 годзин, а дзецински на 11,30. Уходнїци за вечарши представи 100 динари, а комплет картох за дзецински представи кошта 200 динари.

ПОВЯЗАНИ ТЕКСТИ