КУЛА – Аґенция за безпечносц у транспорту и Општина Кула вовторок, 7. юния, орґанизовали вецей акциї на хторих промововане почитованє транспортних предписаньох и транспортна култура, а пре звекшованє безпечносци у транспорту дзецох и младих.
Транспортно-образовни годзини за предшколски и дзеци з перших класох основних школох отримани у салох домох култури у вецей местох, а на такей годзини у Червинки були и школяре першей класи ОШ „Петро Кузмяк” и предшколци з Оддзелєня „Цицибан” з Руского Керестура. Популарни рисовани юнак „Пажљивко” дзецом на интересантни способ потолковал як ше маю справовац у транспорту.
У Културним центре Кула отримана трибина за штредньошколцоих и младих вожачох, а за гражданох у центре Кули промоция безпечносци у транспорту и зоз симулатором за директне збиванє автох и преврацанє превозки. Зоз спомнутима програмами були облапени коло 1000 учашнїки зоз шицких местох кулскей општини.
З нагоди орґанизованя транспортних акцийох и програмох за безпечносц у транспорту предсидатель Општини Кула Перица Видеканїч бешедовал з представительом Аґенциї за безпечносц у транспорту, началнїком Полицийней станїци у Кули Жельком Воїновичом и представительом Совиту за безпечносц у транспорту Деяном Алексичом.
На схадзки порадзене о дальших активносцох на тим планє, а визначуюци барз добре сотруднїцтво локалней самоуправи и Аґенциї, Видеканїч гварел же Општина Кула нарок видвої значни средства за укладанє до транспортней инфраструктури.
