БЕРКАСОВО – Всоботу, 21. новембра, на швето Архангела Михаила, у Беркасове зоз Шветочну Службу Божу преславене храмове швето – Кирбай. Службу предводзел о. Йоаким Симунович, парох миклошевски, а сослужовали седемцме священїки з нашого Апостолского еґзархату и з Крижевского владичества у Горватскей.
У казанї о. Симунович наглашел значносц добрих ангелох у християнским живоце, котри остали дошлїдни Господу, а предводзел их Архангел Михаил, наспрам єдней часци ангелох котри ше придружели Луциферови и постали зли ангели.
О. Симунович з тей нагоди на Служби окреме привитал дзеци и здогаднул на дзецинску молитву „Ангелу, хранителю мой”, за хтору гварел же є нє лєм дзецинска, алє молитва шицких вирних.
На концу Служби Божей одшпиване „Многолїствиє”, а пре диждж нє бул обход коло церкви, з читаньом Євангелийох.