НОВИ САД/РУСКИ КЕРЕСТУР – Млада атлетичарка Кристина Катона з Руского Керестура прешлого тижня на двох финалних змаганьох школских першенствох у атлетики у Войводини освоєла перши места у скаканю до висока и злєпшала свой особни рекорд.
Понеже є народзена 2002. року, Кристина мала право змагац ше на войводянским финалним змаганю Школского першенства у атлетики за школярох по 6. класу ОШ, хторе у Новим Садзе отримане 4. юния, дзе прескочела палїцу на висини 1,49 метери, з чим освоєла перше место и за 2 цм злєпшала особни рекорд. На истим змаганю Микола Папуґа (2002. рок) у обегованю на 60 метери завжал пияте место.
Всоботу, 6. юния, у Новим Садзе отримане и Першенство Войводини у атлетики за старших пионирох, на хторим Кристина Катона у скаканю до висока освоєла перше, а Антония Монар друге место. Катонова тераз прескочела 1,50 м, Монарова 1,45, так же Кристина всоботу знова злєпшала свой особни рекорд у скаканю до висока.
Друге место освоєл и Иван Будински у руцаню копиї, и зоз 40,81 метер поставел свой нови особни рекорд, а Иван друге место освоєл и у руцаню кулї.
Женска штафета з Керестура у обегованю штири раз по 100 метери освоєла треце место, а творели ю Даяна Сабо, Кристина Катона, Валерия Ковач и Антония Монар.
Даяна Сабо ше на тим першенстве змагала и у обегованьох на 100 и 300 метери, Валерия Ковач на 100 метери и у скаканю до далєка, а Тереза Будински у обегованю на 600 метери.
И за тоти змаганя атлетичарох пририхтала Саня Тиркайла.
