ДЮРДЬОВ – У 20. колу Подручней фодбалскей лиґи Нови Сад, хторе одбавене 17. априла, фодбалере Бачки, на своїм терену, победзели у стретнуцу зоз фодбалерами ФК „Єдинство” зоз Ґосподїнцох з резултатом 3:2. Сушедни „дерби“ оправдал назву у шицких сеґментох фодбалского стретнуца. На Бачковим терену давно нє присуствовало таке красне число публики.
Фодбалере Бачки ше максимално закладали за кажду лабду и за кажду акцию на шицких часцох терена. Бависко госцох у даскелїх хвилькох було на гранїци нєспортского справованя.
Перши ґол посцигла Бачка у 54. минути. Фодбалере Єдинства нє спадли под прициском и после штирох минутох и вони дали перши ґол. Же борба була нєизвесна гутори то же обидва екипи пошвидко дали и други ґол, Бачка у 60. минути, а Єдинство у 64. минути. Душан Тривунович у 85. минути посцигнул свой други ґол на стретнуцу, а треци ґол за Бачку.
Хвиля нє одвитовала бавячом, бо дул моцни витор.
После того кола Бачка ше врацела на 7. место на таблїчки зоз 27 бодами. У шлїдуюцим колу дюрдьовски фодбалере буду госцовац у Катю, дзе их дочекаю фодбалере ФК „Юґович”.
