БЕОҐРАД – Сербия ище нє вивезла кукурицу хтору уж предала, понеже нїзки водостой Дунаю загамовал транспорт, та ладї чежко уходза до пристанїщох и находза плївни драги, гварел тих дньох за нашо медиї директор „Житох Сербиї” Вукосав Сакович. Прето ше обава же при концу тогорочней сезони лупаня кукурици нє будзе достаточно складзиска за кукурицу. Як гварел, з пороснуцом водостою, поросла би и цена кукурици, цо можебуц и будзе до конца рока, алє за тераз, кукурица нє будзе драгша.
Як за портал „Аґросервис” виявела о.д. директора Робних резервох Зорица Андєлкович, Влада Сербиї можебуц пошвидко принєше одлуку о одкупу 50 000 тонох меркантилней кукурици за потреби Державних робних резервох. Прецизовцала же польопривредни ґаздовства до Робних резервох годни понукнуц найвецей 100, а задруґи 200 тони кукурици, по 16,5 дин/кґ. Як наводзи спомнути портал, за розлику од скорейших, у тим одкупу за Робни резерви нє будзе заключованя контрактох по рядошлїду приявйованя, алє ше будзе розпатрац шицки понукнуца зоз шицких реґионох, пре ровномирнєйши одкуп кукурици.
Фаховци за тарґовину зоз житарками оценюю же цена кукурици нє будзе менша од терашнєй, алє же будзе благо роснуц початком идуцого року. И вони ше обаваю же чи за кукурицу будзе досц маґазини.