ПЕТРОВЦИ – И попри жимнєйшей хвилї, паски и кошарки з вельконоцним єдзеньом на Вельку ноц по григориянским календаре у Петровцох, у Горватскей, традицийно пошвецени у церковней порти, а церква була виполнєта з домашнїма и госцами – пише Рутенпресу парох у Петровцох о. Владимир Седлак.
– У тим ювилейним року Божого милосердия одбула ше нєкаждоньова подїя – же ше по григориянским календаре поклопели Благовищенє и Вельки пияток, та попри порядних богослуженьох, на Вельки пияток и дополадня служена Служба Божа, хтора була крашнє нащивена – пише о. Седлак, наглашуюци же ше, попри нащиви Исусовому гробу, парохиянє всоботу могли и висповедац.
– У Страсним тижню найнащивенша була Вечурня з викладаньом плащанїци як и, уж традицийно, Служба Божа на саму Вельку ноц. У шицких богослуженьох Страсного тижню першираз того року мали зме и чтеца, бувшого семинаристу котри пензионовани и зоз Швицарскей ше врацел до Петровцох – пише о. Седлак.
Вечар на Вельку ноц у Доме култури у Петровцох отримана и шветочна програма з находи швета Воскресеня Христового. Наступели танєчнїки шицких возростох, Хлопска шпивацка ґрупа, Дзецинска шпивацка ґрупа, солисти и дует петровского КУД „Яким Гарди”. а на концу програми шицки учашнїки и патрачае одшпивали многолїтствиє.
