ГОРНЇЦА – У жемох дзе на Горнїци жию Русини и Лемки, уж вецей роки традиция орґанизованя виставох писанкох и других народних виробкох вязаних за Вельку ноц.
У Ужгородзе, у Закарпатскей обласци України на стреду, 1. априла, у Закарпатским музею народней архитектури и обичайох будзе вистава з назву „Швет писанкох”, на хторей буду виложени стародавни писанки з Подкарпатскей Руси, яки ше и нєшка пише з нагоди Велькей ноци.
У Словацкей, у Свиднїку, Музей українскей култури Словацкого народного музею на штварток, 2. априла, орґанизує 16. виставу „Писанки 2015”, на хторей, попри вельконоцних писанкох, буду виложени и вишивки з фонду Музею.
На Квитну нєдзелю пополадню, по юлиянским календаре, у Ґорлицох у Польскей, Руска Берза, як традицийна орґанизация Лемкох, орґанизує писанє и фарбенє писанкох, а нащивительом буду представени и писанки з архиви инструктора за писанє писанкох Андрея Малецкого.