КОЦУР – На швето Непорочного Зачатия Пресвятей Богородици, 22. децембра, до Коцура сцигнул Вифлеємски огень – Шветло добра и злагоди, хторе принєсли представнїки „Пласту”, Националней скаутскей орґанизациї України, на чолє з єй визначним активистом Андрийом Ребриком з Ужгороду.
Вифлеємски огень традицийно, пред крачунскима шветами, обиходзи шицки жеми Европи и швета, а того року рушел з Бечу, у Австриї, и уж обишол скоро шицки держави у хторих ше Крачун слави по григориянским або юлиянским календаре.
Шветло добра и злагоди по дияспори ноша активисти „Пласту” з України и уж трецираз нащивюю Сербию, а у Коцуре им на тот завод домашнї були шестри служебнїци, котри у манастире орґанизовали пригодну програму и окрипенє за госцох.
На програми з тей нагоди присуствовали и вирни, у чийо мено госцох привитали настоятелька манастиру шестра Михаїла и капелан коцурски о. Михайло Шанта.
Вифлеємски огень сцигнул з Темишвару, у Румуниї, а драгу предлужел до Мадярскей и Словацкей, дзе му домашнї були представнїки тамтейшого „Пласту” и представнїки Грекокaтолїцкей и Православней церкви.