Вишла януарска „Заградка”

автор рим
846 Опатрене

НОВИ САД – Нови рок и друге полроче чечуцого школского року почало з нову „Заградку”, а януарске число цале у знаку жими. На рамику дзеци на шнїгу у Руским Керестуре, як и наймладши Новосадянє на слами у центре городу.

И у тим чишлє рубрика „Фото памятки” приноши фотоґрафиї з лоньского „Червеного пупча”, а з подїйох на хторих були и школяре призначени програма „Мацери Рускинї” у Сримскей Митровици, явна годзина руского язика у школи у Вербаше, Крачунски вашар у Коцуре, новосадска „Пахулька” и манифестация „Днї Миколи М. Кочиша”.

Часопис од Дзецинского оддзелєня Городскей библиотеки у Новим Садзе достал Подзекованє за длугорочне сотруднїцтво, та и о тим пише у найновшей „Заградки”.

До „Чудовишного швета” читачох водзи сказка Агнети Бучко Папгаргаї, а драмску сличку о любови дзецом подаровала Серафина Макайова. Ту и стихи Ксениї Палатинус, Михайла Ковача, Меланиї Римар и Михала Симуновича, а у „Малей заградки” кратки писнї о жимских радосцох на шнїгу и даскельо илустрациї за вифарбйованє.

Школяре-авторе зоз своїма составами и малюнками виполнєли аж штири боки часопису, за розвагу „Заградка” понука два весели забавни боки, а нє лєм за школярох, но за шицких котри дзбаю о чистоти мацеринского язика, на 22. боку рубрика „Нє так, алє так”.

ПОВЯЗАНИ ТЕКСТИ