НОВИ САД – Тих дньох вишло нове, тогорочне октоберске число часопису за дзеци „Заградка”. На рамикох нашо школяре першей класи ОШ у двох оддзелєньох у Руским Керестуре и у єдним оддзелєню у Коцуре, зоз своїма учительками, та рисунки дзецох з керестурского Оддзелєня „Цицибан” ПУ „Бамби” з Кули. Цали други бок „Заградки” виполнєли фотоґрафиї з тогорочного „Червеного пупча”.
У литературней часци часопису обявени писнї и приповедки Меланиї Павлович, Серафини Макаї, Агнети Бучко-Папгаргаї, Меланиї Римар, Штефана Гудака, Дюру Папгаргая, Якима Олеяра и преложени стихи Милени Северович и Виолети Йович, як и приповедки Ани Дудаш и Мариї Ловрич.
Драмску сличку за тото число написал Владимир Дудаш, а у додатку за наймладших „Мала заградка” кратки писнї Миколи Скубана, Силвестера Макая и Ирини Гарди-Ковачевич. Ту и три нови букви з рускей азбуки, за рисованє.
На духовним боку и текст о другей Святей тайни – кресценю, а аж на на трох бокох „Заградки” обявени школярски писмени состави. У рубрики „Висти зоз школох” читаче дознаю як означени Европски дзень язикох у Кули, Руским Керестуре и у Коцуре, та яку програму пририхтали коцурски школяре писательки Серафини Макайовей за єй 70. родзени дзень.
Октоберска „Заградка” тиж приноши интересантни Забавни боки, а и тото число часопису илустровала його нова илустраторка – Александра Медєши з Руского Керестура.