НОВИ САД – За конєц школского рока читаче достали нову, дакус грубшу „Заградку” – двочисло за юний и юлий. Фотоґрафиї на насловним боку шведоча о веселим 5. Стретнуцу предшколских дзецох з руских оддзелєньох у Руским Керестуре, Коцуре и Дюрдьове, хторе отримане у ПУ „Герлїчка” у Коцуре. О тей подїї кратка вистка и на 2. боку, дзе и о Дню школи у Коцуре и госцованю дюрдьовских дзецох з театралну представу „Нєлапшни шаркань” у РКЦ у Новим Садзе.
У тим чишлє „Заградка” приноши и портрети пецерих школярох ґенерациї у Руским Керестуре, Коцуре, Дюрдьове, Кули и у Шидзе, а о успишних школярох з наших местох пише на 17. боку. У рубрики „Висти зоз школох” на двох бокох обявени резултати з републичних змаганьох з руского и сербского язика и мена наградзених школярох на Смотри кириличней писменосци у Тителю.
У литературней часци часопису писнї Силвестера Д. Макая, Мирона Будинския, Ирини Гарди Ковачевич и Меланиї Павлович и приповедки Евґения Чакана, Тамари Хрин и Меланиї Римар. З найновшима творами за дзеци представени и писателє-госци Томислав Дьокич, Оливера Оля Єлкич и Драґан Драґичевич.
Найкрасши литературни и подобово роботи у тим чишлє виполнюю аж пейц боки. За розвагу ту лавиринт, гумор, ребуси, як и стаємна рубрика „Вериш? Нє вериш?”.