НОВИ САД – Вчера вишло нове число часопису МАК, чия тема Виртуални швет, а як додаток вишол мурови календар – од юния того, по май шлїдуюцого року.
На муровим календаре 12 фотоґрафиї младих авторох, вибрани спомедзи скоро 200 роботох хтори сцигли на МАК-ов конкурс за фотоґрафиї. Фотоґрафиї хтори нє обявени на календаре, редакция будзе обявйовац у часопису.
У майско-юнийским чишлє МАК-у мож пречитац тексти о дружтвених мрежох, електронским насилстве, о тим чи млади зависни од интернету, та других подобних темох. МАК у тим чишлє представя и нашу Ґимназию у Керестуре и Оддзелєнє за русинистику у Новим Садзе.
Медзи иншим, ту и стємни рубрики – „Збуло ше”, „Так и нїяк иншак” и „Студентски кухар”, як и интервю з новим предсидательом младежскей нєвладовей орґанизациї „Пакт Рутенорум” Якимом Винайом, та з ТВ-новинарку Любицу Фечо.