ҐОСПОДЇНЦИ – Вчера вечар, на 18 годзин, у грекокатолїцкей церкви Святого Архангела Михаила у Ґосподїнцох було Бдиниє котре служел вербаски священїк о. Алексий Гудак, у Служби шпивали члени фамелиї Холошняй зоз Дюрдьова, з нїма вєдно и о. Михаил Холошняй. После Бдиния було мированє.
Потим, у парохиялней сали отримана програма пошвецена Павлови Жилникови, архитектови котри робел на ґосподїнскей грекокатолїцкей церкви. Шицких присутних привитал домашнї о. Михаил Холошняй, а потим о роботи и живоце Павла Жилника бешедовал Дюра Жилник зоз Нового Саду, син Павлового власного брата и Владимир Салонски зоз Ґосподїнцох. З тей нагоди отворена вистава портетох нарисованих зоз клайбасом спомнутого архитекти.
Нєшка, 21. новембра, по юлиянским календаре швето Собор Архистратига Михала, а у ґосподїнскей грекокатолїцкей церкви храмове швето – Кирбай. Кирбайска Служба Божа будзе на 11 годзин.
