РУСКИ КЕРЕСТУР – У Основней и штреднєй школи з домом школярох Петро Кузмяк, вчера 10. юния почал други круг тестираня школярох зоз сербского як нємацеринского язика, у тим школским 2020/2021. року.
И тераз, як и на початку школского року, тестиранє ше окончує онлайн, з тим же школяре 2. и 3. класи основней школи тести поробели у школи, зоз технїчну помоцу своїх учителькох, а старши возрости, школяре 6. и 7. класи основней, як и школяре 2. и 3. класи Ґимназиї, тест буду мац можлївосц поробиц и з дому.
Слово о проєкту хтори почал пред пейцома роками, а окончує ше з цильом же би ше провадзело нови програми настави и ученя, хтори вєдно запровадзую Мисия ОЕБС у Сербиї и Завод за унапредзованє образованя и воспитаня.
Школяре тест робя анонимно, прейґ платформи Заводу за унапредзованє образованя и воспитаня, хтори источашнє и ношитель проєкту, а тестиранє будзе тирвац по штварток 17. юний.