РУСКИ КЕРЕСТУР – Традицийну кошарку червених ружох и дзивоцку ладу освоєла млада Кристина Афич з Руского Керестура, школярка другей класи рускей Ґимназиї, а чобольов Роберт Загорянски, Керестурец зоз Суботици, наш уж искуснєйши шпивач, абсолвент анґлистики и ґерманистики у Суботици.
Найстарша манифестация Фестивалу рускей култури – „Червена ружа”, з хторей и вироснул терашнї Фестивал, отримана вчера, 2. октобра, тиж у керестурскей Спортскей гали, а за титулу „найкрасши глас” на „Ружи” того року ше змагали єденацецеро млади шпиваче, векшином штредньошколци.
З рускима шпиванками на „Ружи” участвовали Наташа Шовш и Марко Буила з Коцура, Леонтина Штефанко, Себастиян Надь, Саня Чапко и Марина Роман з Керестура, Ивана Чордаш з Нового Саду, Кристина Горняк и Лидия Горняк з Дюрдьова, та спомнути побиднїки.
Шпивачох провадзел Вельки народни оркестер Дому култури Руски Керестур, под дириґенством мр Мирка Преґуна, а оценьовал их фахови жири – Геленка Гарвильчак, Таня Орсаґ и Владимир Малацко.
У другей часци програми окремни забавни оркестер – Владимир Медєши на бас-ґитари, Сашо Палєнкаш на ґитари, Мирко Преґун на клавиятури и Златко Русковски на буґнох, та одлични шпивачки Саня Дивлякович (Полдруги), Анамария Колошняї и Танита Ходак, виведли осем авторски забавни композициї Керестурца Златка Русковския з його музичного албуму „Лєм єден погляд”, обявеного прешлого року у виданю МАК-у, односно НВУ „Руске слово”.
Медзи другима госцами, змаганє за найкрасши глас провадзел и амбасадор України у Сербиї Олександр Александрович, руководителє манифестациї були Мая Зазуляки, котра авторка и конферанси, и Сашо Палєнкаш, а програму водзели Адриана Надь и Андрей Орос.
(Вецей фотоґрафиї зоз змаганя за найкрасши глас будзе у окремней ґалериї на правим боку сайту „Руского слова” и Рутенпресу).