КОЦУР – Руска матка вчера вечар у Доме култури у Коцуре представела двацете число свойого глашнїку „Руснак”. На промоциї бешедовали предсидатель Рускей матки Дюра Папуґа, та Мария Дорошки и проф. др. Михайло Фейса.
Папуґа визначел же читаче у новим чишлє глашнїку „Руснак” можу пречитац о отриманих подїйох значних за Руску матку, як цо то Подобова колония „Коцур 2015”, зашеданя Шветовей ради Руснацох/Русинох/Лемкох и Шветового форуму русинскей младежи, о Културней манифестациї „Кед голубица лєцела” у Петровцох, о означованю 250-рочнїци грекокатолїцкей церкви у Коцуре и 100-рочнїци приселєня часних шестрох Служебнїцох до Коцура и других темох.
Мария Дорошки бешедовала о рубрики „Поетски куцик”, у хторей у представяним чишлє поезия и малюнки Керестурцох Славка Папа и Янка Бикия, а Аранка Медєши пречитала два Папово обявени писнї.
Проф. др Михайло Фейса обрацел увагу на свойо два тексти у тим чишлє „Руснака”, а бешедую о Штвартим Конґресу русинского язика у Прешове и спомнутих ювилейох у Коцуре.
Коцурска промоция „Руснака” була друга по шоре, а як за Рутенпрес гварел Папуґа, свой глашнїк Руска Матка пошвидко представи и у Вербаше, Кули и Новим Садзе.