СЕРБИЯ/ГОРВАТСКА – Пре одлуку Влади Горватскей же би заварли гранїцу за шицки превозки зоз сербскима таблїчками, окрем за камиони хтори превожа робу хтора ше швидко губи, гражданє винаходза способи як войсц, лєбо висц з Горватскей.
Як пише „Блиц”, гражданом котри плановали исц до Словениї, лєбо Австриї, совитує ше же би до Горватскей вошли з Мадярскей, лєбо з Босни и Герцеґовини (БиГ). Тиж так, гражданє Сербиї, котри ше врацаю до своєй держави, найлєпше же би до нєй вошли з Мадярскей, лєбо БиГ.
Шицки автобуси хтори зоз Сербиї иду до Горватскей вчера були одказани, а путнїцки гайзибани нє иду од соботи. Праве прето векши гужви на гранїчних преходох з БиГ до Сербиї. Найобтерхованши преходи Рача, Шамац, Босански Брод и Ґрадишка, бо окрем камионох хтори превожа робу до и з БиГ, тераз тоту гранїцу преходза и камиони хтори нє можу прейсц гранїцу медзи Сербию и Горватску.
На преходзе Шид-Товарник зоз сербским пасошом до Горватскей мож войсц лєм пешо, а з горватского боку до Сербиї превозки уходза без проблему.
Медзитим, як вчера вечар пренєсол Танюґ, гранїчни преход Шид-Товарник бул цали дзень отворени за путнїцки превозки зоз сербскима и горватскима реґистерскима таблїчками з обидвох бокох, а преход забранєни лєм терховним превозком. Як репортером Танюґу на гранїци гварели припаднїки полицийох з обидвох державох – тот гранїчни преход функционує подполно нормално.