РУСКИ КЕРЕСТУР – У полней сали Дома култури пияток вечар, 22. марца, представа „Гунцут дзивки” отворела тогорочни 51. Драмски мемориял Петра Ризнича Дядї. На текст українскей писательки Наталиї Уваровей у режиї Владимира Надя Ачима, представу виведол седемчлени ансамбл младежскей ґрупи керестурского Дома култури витворени з младих ґлумцох и двох искуснєйших.
Же би ше витаргали з подполней безпенєжносци до якей вошли, млади дзивки ше нєдзечнє одлучую на интернет спреводзку з хтору компромитую свою полносц. Прето же жию у нєпреривней еґзистенциялней борби, надумали ше представиц як лезбейки, гоч су нє тоти, же би освоєли пенєжну награду од єдней панї з Америки, хтора ю обецала найкрасшей лезбейскей пари. Ситуация пошла у цалком другим напряме, кед их панї вибрала и пришла нащивиц. Правда вше найдзе драгу, та и у тей представи розяшнєла нє лєм тоту спреводзку, алє поскладала и други давно потаргани нїтки медзи актерами, и видзвигла природни вредносци хтори сучасна култура систематично поцискує.
Тота представа ма свою вецейпасмовосц. Єй глїбши смисел ше указал праве у побиди природних вредносцох над тима „модернима” яки восточним жемом наруцує „богата” заходна култура. Керестурски ансамбл провокативну тему лезбейства представел цалком културно и на гумористични способ. Вибор сучасней музики бул одлични, темпо представи бул добри и у каждим диялоґу ґлумци надбавйовали єден другого.
Спред Културного центру Кула награду за найлєпше одбавену улогу достала Оленка Живкович, а спред жирия публики Марина Надь. Представа бавена и пред селектором Општинскей драмскей смотри Давидом Кецманом.
Вецей фотоґрафиї мож поопатрац у нашей фотоґалериї.