БЕОҐРАД – Министер польопривреди и защити животного штредку Бранислав Недимович гварел же до конца идуцого рока буду познати правни ришеня хтори странцом онєможлївя купованє польопривредну жеми у Сербиї, визначуюци же пре тото нє будзе меняни Устав, алє держава охранї свой интерес.
Концом 2017. рока виходзи термин за усоглашованє законодавства Сербиї з одвитуюцим у ЕУ, по хторим би иножемни гражданє могли куповац польопривредну жем у Сербиї, цо предвидзене зоз Спорозуменьом о стабилизованю и придружованю з 2013. року.
Бешедуюци на конференциї за новинарох вовторок, 20. децембра на Польопривредним факултету, министер Недимович гварел же кажди три-штири мешаци буду орґанизовани стретнуца представительох його министерства, студентох и професорох на Польопривредним факултету пре розгварки о ришованю проблемох у польоприврреди, а же за польопривреду у державним буджету за нарок опредзелєни 3,32 милиярди динари, цо за 8,2 одсто вецей як того року.
Як преноши Бета, Недимович наглашел же нарок будзе вимєнєне одвитуюце законодавство же би и жени на валалє могли доставац положнїцке хорованє, а будзе реґуловани и статус сезонских роботнїкох.
Министер визначел и же идуцого року за проєкт наводньованя з кредиту Зєдинєних Арабских Емиратох 11 милиони еври буду опредзелєни за системи за наводньованє у Войводини, а 3 милиони у других часцох Сербиї.