Дочек орґанизовано у центре и на штирох местох

автор зам
833 Опатрене

РУСКИ КЕРЕСТУР – Як то узвичаєне, Месна заєднїца Руски Керестур и того 31. децембра у центре Керестура орґанизує заєднїцки дочек Нового року, дзе на пол ноци будзе и традицийни огньомет. Дзень пред тим, на стреду, 30. децембра, на 14 годзин у Велькей сали Дому култури дзеци дочекаю Дїда Мраза, котри им подзелї пакецики, а на 17 г. у конференцийней сали спортскей гали будзе традицийна преширена схадзка Совиту Месней заєднїци.

Керестурци Нови рок годни дочекац и у штирох погосцительних обєктох –  у Ресторанє „Червена ружа”, дзе конзумация кошта 2 800 динари, а грає „Пицикато бенд”; у Ресторанє Лонґов на беґелю, дзе уходнїца 400 динари и плаци ше лєм за музику, потим у Дискотеки „Амадеус” у Доме младежи, дзе уход 300 динари, а за дочек ше мож записац и у кафичу „Мала оаза” у центре валалу, дзе конзумация два, а од пол годзини по пол ноци тисяч динари.

За дочек Нового року у спомнутих местох єст заинтересованих, а шицки планую орґанизовац и репризу дочеку, 1. януара.

Велї млади Нови рок дочекаю и у приватней режиї по обисцох, а векшина Керестурцох тоту ноц планую препровадзиц дома, у кругу найблїзших и з приятелями.

Як дознава Рутенпрес, младши Керестурци ше на дочек Нового року рихтаю и до векших сушедних местох, алє найвецей до Нового Саду, на заєднїцки дочек на Площи шлєбоди.

У Руским Керестуре традиция и же ше на пол годзини вноци 1. януара у церкви служи Новорочни молебен.

ПОВЯЗАНИ ТЕКСТИ