РУСКИ КЕРЕСТУР – Рускокерестурска парохия вчера означела Вельки Пияток по григориянским календаре – дзень кед Исус Христос бул розопяти на криж и умар. На 8 годзин була Утриня з читаньом 12 Євангелийох, а понеже на тот дзень и швето Благовищенє, єдна Євангелия була з Благовищенє.
На 15 годзин наш апостолски еґзарх, владика кир Георгий Джуджар з домашнїма священїками служел Вечурню з покладаньом плащанїци до Христового гробу.
У церкви було вельо вирних котри до нєшка вечара можу циловац плащанїцу.
Кед цилуєме плащянїцу – з тим духовно преглїбюєме Боже милосердиє, чому пошвецени и тот рок. На таки способ ше и ми можеме намагац буц милосердни и у любови – наглашел парох керестурски о. Михайло Малацко.
