НОВИ САД – Представителє „Еґзит“ фестивалу и городох Нови Сад, Беоґрад, Темишвар и Будва подписали Протокол о сотруднїцтве, з намиру же би тоти реґионални центри постали центри креативних индустрийох у реґионє.
На подписованю Протоколу визначене же за шицки городи-подписнїкох тот документ значни прето же на основи нього можу обчековац приходи од туризму, а окреме буду робиц на розвою креативного, та младежского туризму.
– Фестивал „Еґзит“ барз значна карика у розвою младежского туризму и прето зме ше позберали и подписали тот Протокол, же би Нови Сад нєсебично подзелєл тото цо ма. „Еґзит“ ше уж 15 роки орґанизує у Новим Садзе и посцигнул огромни успих, хтори нє будзе любоморно чувац, алє тоту енерґию прешири и на реґион – гварел член Городскей ради Нового Саду задлужени за финансиї и буджет Деян Мандич.
Подписнїки ше обовязали же у рамикох своїх можлївосцох оможлївя реализацию проєктох хтори на хасен и „Еґзиту“ и городу, окреме кед слово о запровадзованю и преширйованю реґионалней фестивалскей мрежи, як основи за зазберованє младих и розвой младежского туризму.