НОВИ САД – Заводу за културу войводянских Руснацох (ВР) одобрени два проєкти з хторима конкуровал до Министерства култури и информованя и до Городу Нови Сад, винєсол директор Заводу мр Серґей Тамаш на схадзки Националного совиту Руснацох всоботу, 12. септембра.
Министерство зоз 474 399 динари потрима проєкт „Приручна библиотека Руснацох – Формованє фонду руских кнїжкох”, а Город зоз 200 000 динари видаванє нового компакт-диску Националного оркестру Руснацох.
Як гварел Тамаш, очуванє нашого културного скарбу, його ширенє и представянє основни циль наменских средствох за приручну билиотеку. Библиотека будзе полуотвореного типу, будзе умрежена з Городску библиотеку Нового Саду, з Одсеком за русинистику, другима рускима институциями и канцелариями.
Библиотека будзе мац и инернационалне значенє, понеже плановане позберац и предочиц публикациї вязани за Руснацох/Русинох и звонка нажей жеми, у шицких обласцох. Намаганє же би у Библиотеки були заступени шицки руски авторе з Войводини, Сербиї, реґиону и з других жемох, плановане мац найменєй 2 000 наслови, алє и електронску базу одредзених документох. Снованє такого подцагу потримала и Народна библиотека з Беоґраду, гварел Тамаш.
У тим напрямє пияток, 11. септембра, и представителє Заводу участвовали на семинаре за библиотекарох у Войводини, у орґанизациї ЕУ Инфо Поинт Нови Сад, на хторим представени и програми на хтори библиотеки можу конкуровац за средства ЕУ.
Други компакт-диск Националого оркестру Руснацох би мал буц обявени до конца рока, а на нїм буду и гимна Сербиї и шветочна шпиванка Руснацох у Сербиї, у виводзеню Хору „Гармония” з Нового Саду.
Тамаш на схадзки НС наявел же до конца рока Завод за културу ВР будзе участвовац у витворйованю єдного мултинационалного проєкту – театралней представи „Свадзба” А. П. Чехова, хтору ше будзе виводзиц на вецей язикох, а проєкт потримує Покраїнски секретарият за културу и явне информованє.