СТАРИ ЯНКОВЦИ/ПЕТРОВЦИ – На ютре и поютре, 19. и 20. септембра, у Горватскей буду отримани схадзки Шветовей ради Руснацох/Русинох/Лемкох (ШР РРЛ) и Форуму русинскей младежи (ФРМ), перши после їх виборох на тогорочним Тринастим Шветовим кнґресу РРЛ у Румуниї.
Зашеданє ШР, под предшедованьом Степана Лявинца з Мадярскей, на ютре почнє у Старих Янковцох и на нєдзелю будзе предлужене у Петровцох, док схадзка ФРМ на ютре будзе у Старих Янковцох.
На схадзки ШР планована анализа 13. Шветового конґресу РРЛ у Деви, у Румуниї (од 18. по 21. юний), та догварка о витворйованю заключеньох и Резолуциї Конґресу, як и заключеньох з комисйох Конґресу у наступним периодзе.
Будзе винєшена и дїялносц предсидателя Ради од вибору до тераз, на дньовим шоре и вимирйованє членарини (кажда членїца плаци 100 еври рочно), та дальши активносци ШР и орґанизацийох-членїцох ШК РРЛ.
На ютрейшей першей схадзки у Старих Янковцох, руководительство ФРМ, на предкладанє каждей орґанизациї-членїци, принєше план и програму роботи, а за младих буду орґанизовани и два роботнї – „Народни шпиванки панонских Руснацох” и „Народней облєчиво панонских Руснацох”.
Домашнї обидвом зашеданьом Дружтво Руснацох Горватскей „Руснак”.