ДЮРДЬОВ – Вчера на главней драги у Дюрдьове, при дзецинскей заградки и основней школи (ОШ), два пешацки преходи видзвигнути з бетоном, пре спомалшованє превозкох на тих местох.
Пошвидко у Дюрдьове, у Святосавскей улїци при ОШ будзе поставени метални „лєжаци полицай”, при дзецинскей заградки защитна метална ограда за унапрямйованє дзецох, як и ткв. „вибро-пантлїки”, тиж пре зменшованє швидкосци превозкох на местох дзе драгу преходза дзеци и други пешаки.
Швидкосц на главней драги коло школи и дзецинскей заградки, односно у строгим центре валалу уж огранїчена на 30 км на годзину, а скорей поставена и защитна ограда за унапрямйованє дзецох при ОШ, як и „лєжаци полицає” у Рускей улїци, дзе дзецинска заградка.
Роботи финансує Министерство будовательства, транспорту и инфраструктури, а на инициятиву Совиту родичох од пред штирома роками и дюрдьовскей школи.
