ОСИЄК – На Мемориялни турнире у столним тенису „Владимир Тимко”, хтори всоботу, 10. октобра отримани у Осиєку, участвовали Мирослав Мудри, Томислав Мишир, Зденко Сивч, Мирко Рибич, Татяна Тимко и Агнетка Балатинац. По интерней догварки, перше место освоєл Мирослав Мудри, друге место додзелєне Татяни Тимко, а треци бул Зденко Сивч.
Мемориялни турнир у столним тенису „Владимир Тимко” орґанизує КУД Руснацох Осиєк, як здогадованє на покойного снователя Дружтва Владимира Тимка, котри нєсподзивано умар 2008. року. Турнир интерного характеру.
Дружтво побиднїком пририхтало и скромни награди, котри им уручела Славица Тимко, ґдовица покойного Владимира, а змагала ше и його дзивка Татяна Тимко.
По законченю змаганьох, бавяче и присутни члени КУД Руснацох Осиєк ше погосцели з пасулю, хтору традицийно за тоту нагоду уж роки вари „Обер Ланч Бар”, односно Зденко и Мандица Сивч.