МИКЛОШЕВЦИ – На Други дзень Крачуна, всоботу, 26. децембра, у Дружтвеним доме у Миклошевцох отримана Крачунска програма, у орґанизациї домашнього КУД „Яким Ґовля”. Крачунска програма була нагода указац и рочну роботу шицких секцийох КУД, та и на таки способ означени ювилей – 65-рочнїца роботи КУД „Яким Ґовля”.
На початку прогрми школяре нїзших класох Подручней школи Миклошевци, котри виучую руски язик при учительки Лесї Мудри, приказали крачунски звичаї Руснацох, а потим з даскельо колядами наступели Женска шпивацка ґрупа домашнього Дружтва, Хлопска шпивацка ґрупа КУД „Яким Гарди” з Петровцох, а на концу и вєдно одшпивали два шпиванки.
Дзецинска танєчна ґрупа, под руководительством Єлени Сабадош, одтанцовала Руски народни танци, док младежска ґрупа виведла „Горнїцки танєц” и дзивоцки „Ей, на тарки”. Школярка седмей класи Сабина Ждиняк рецитовала стихи о Вилїї и Крачуну Любки Сеґеди Фалц, а програму водзели школяре Анамария и Матей Мудри.
Медзи госцами на програми були член Совиту за национални меншини Републики Горватскей Звонко Костелник, заменїки началнїка Општини Томповци Здравко Звонарич и Мирослав Лїкар, предсидатель Ради рускей националней меншини Вуковарско-сримскей жупаниї Борис Бучко, предсидатель Месного одбору Миклошевци Дюра Бики и парох миклошевски и викар сримско-славонски о. Яким Симунович.
