Же мож зарабяц и прейґ интернету, каждодньово нам потвердзую велї YouTube „гвизди“, „блоґерe“, „влоґерe“, „инфлуенсерe“. Желько Данґубич з Нового Саду нам представи дакус иншаки способ заробку котри му на початку бул лєм гоби, а тераз ше розвил до правей роботи.

Представ нам ше?

Жeлько Дангубич: Мено и презвиско ми Желько Данґубич, мам 32 роки. По походзеню сом зоз Дюрдьова, алє уж длугши час жиєм у Новим Садзе.

З чим ше занїмаш?

ЖД: Робим рекламни фотоґрафиї и дорабям (ретушуєм) фотоґрафиї за других фотоґрафох. Так же робим два роботи источашнє.

Кельо роки то уж робиш?

ЖД: Седем роки жиєм лєм од того. Скорей того сом робел як дизайнер у друкарнї цо було лєм пририхтованє за тоту роботу.

Як ши почал зоз роботу?

ЖД: Мой оцец ше занїмал зоз фотоґрафию, дизайном и мальованьом, та сом од малючка бул уключени до шицкого того. Пресудни момент бул кед сом одлучел зохабиц роботу у друкарнї и започац власни бизнис. На початку сом ретушовл фотоґрафиї за других фотоґрафох и помали сом зберал пенєж и опрему же бим ше и сам могол упущиц до водох фотоґрафиї. Буквално сом глєдал фотоґрафох по цалим швеце, посилал им мейли зоз прикладнїками моєй роботи. Послал сом коло 100 мейли на розлични адреси, а достал сом лєм 3 одвити и лєм єден фотоґраф почал сотрудзовац зо мну. После того почали препорученя, алє и я поставал вше лєпши. На початку сом фотоґрафиї предавал на рижних сайтох – iStock, Shutterstock, Dreamstime… За єдну фотоґафию сом доставал  коло 30 центи, так же нє бул битни квалитет, алє квантитет.

Опиш нам свою роботу?

ЖД: Цо ше дотика ретушованя, клиєнт ми пошлє фотоґрафиї и упутства як жада же би випатрали и цо треба доробиц  на фотоґрафийох. Сотрудзуєм з розличнима фотоґрафами – даєдни фотоґрафую лєм єдзенє, лєбо лєм ентериєр, а други заш робя за познати готели, шветово марки автох, облєчива, обуї…

Цо ше дотика фотоґрафованя, перше здумам цо будзем фотоґрафовац, потим глєдам одвитуюци амбиєнт, анґажуєм модели и на концу тоти фотоґрафиї предавам прейґ єдней аґенциї зоз Нємецкей.

Путовал ши даґдзе пре роботу? Кед гей, дзе?

ЖД: Фотоґрафованє у студию вецей нєпопуларне, так же кажде фотоґрафованє на другей локациї. Каждого року пре роботу путуєм до иножемства. Бул сом у Французкей, Нємецкей, скоро у цалей централней Европи, та и у  Зєдинєних Арабских Емиратох.

Дзе шицко твойо фотоґрафиї мож найсц?

ЖД: Мойо фотоґрафиї хасную фирми котрим лєгчейше и туньше плациц лиценцу за єдну фотоґрафию як орґнизовац фотоґрафованє пре єдну фотоґрафию котру буду хасновац на сайту, лєбо у реклами. Мойо фотоґрафиї мож найсц од фейсбуку та по вельки билборди. Часто ше случує же на путованьох по иножемстве видзим плоди моєй роботи на аеродромох, у каталоґох, часописох, авзлоґох. Мой брат пред даскельома роками бул у Дохи (Катар) и док чекал у амбуланти, вжал їх новини и препознал два особи на єдней од фотоґрафийох. Були то нашо шестра и брат.

Тиж так, мойо фотоґрафиї можеце найсц на ФБ профилу Dangubic Images, инстаґраму @zeljkodan и на Westend61- Zeljko Dangubic.

Маш наймилшу фотоґрафию?

ЖД: Гевта котру лєм цо нє направим. Скорей каждого фотоґрафованя пририхтованя тирваю даскельо тижнї. Од вибору и анґажованя моделох по здумованє идейох. У тим ми найвецей помага моя супруга Наташа, котра роби вєдно зо мну. Вєдно пишеме тези, рисуєме скици, у глави здумуєме сцени. Шицко тото кулминира на самим фотоґрафованю котре тирва даскельо годзини. Як ше фотоґрафиї найду на сайту аґенциї, почина здумованє идейох за нове фотоґрафованє.

Маш даяку анеґдоту зоз фотоґрафованя?

ЖД: Пред даскельо роками сом путовал до Паризу пре семинар и нє мали зме вельо шлєбодного часу за озбильнєйши фотоґрафованя, та сом контактовал єдну дзивку прейґ фейсбуку и так зме ше шицко и догварели. Медзитим, кед зме сцигли на догварену локацию, указало ше же дзивка нє зна анґлийски язик и же цали час хасновала Google Translate, а я нє знам французки. Но, то нє було нїяке препреченє же бизме направели одлични фотоґрафиї. Тиж так, шицко тото ше случовало после бомбашского нападу у Паризу. Цали город бул полни зоз полицию и випатрал як под обшеднуцом.

Яки ци плани за будучносц?

ЖД: Уж зме коло два роки реґистровани як фирма Dangubic Images и вшелїяк же ми циль ище напредовац. Остатнї час сом почал робиц и видео знїмки без звука, та ми план усовершиц и тото як и фотоґрафию. Видео знїмки без звука то у ствари фотоґрафиї зоз рухом котри ше можу хасновац як часци видео рекламох. Єден од цильох ми и же бим дошол до рекламних аґенцийох. Теди бим могол робиц реклами за вельки шветово марки.