НОВИ САД – Толкуюци Програму роботи Заводу за културу войводянских Руснацох (ВР) на шестей схадзки Националного совиту Руснацох, директор Заводу Серґей Тамаш 5. децембра гварел же Завод з рижнима змистами нарок Руснацох планує представиц у Беоґрадзе, алє и у України и Словацкей.
Представянє Руснацох, односно нашей материялней и нєматериялней култури, у Беоґрадзе будзе у Етноґрафским музею у авґусту, а як поведзене, Етноґрафски музей тоту програму уж учишлєл до своєй активносци у идуцим року.
У Етноґрафским музею у Беоґрадзе плановане представиц нашо народне облєчиво, фотоґрафиї зоз склєняних неґативох фотоґрафа Осифа Будинския з Руского Керестура, моноґрафию „Народне облєчиво и танци бачванско-сримских Руснацох” и друге, а представянє буду провадзиц и музични и литаратурни змисти.
Подобни презентациї Руснацох зоз Сербиї, з представяньом и виданьох наших видавательох, уж у фебруаре 2016. року би мали буц отримани у Ужгородзе, у України, як и на яр, лєбо початком лєта у Прешове, у Словацкей, а на основи подписаних Медзиреґионалних спорозуменьох Войводини з обласами у України, односно Словацкей.