БЕОҐРАД – Влада Сербиї 30. юния одлучела же и надалєй, на пол рока, буду важиц увозни такси (прелевмани) на млєко и продукти з млєка зоз жемох Европскей униї. Як гварел совитнїк премиєра Драґан Ґламочич, тота мира принєшєна насампредз пре охрану малих продуковательох млєка у Сербиї, котри ше нє можу ношиц з конкуренцию.
Ґламочич здогаднул же ше з продукцию млєка з меншим числом кравох у нашей жеми занїма вецей як 97 одсто ґаздовствох.
Прелевмани на млєко Влада Сербиї уведла у юнию прешлого року, так же увозни такси на млєко виноша од 10 до 20 дин. за литру, за квашно-млєчни продукти од 10 до 30 динари, а з тоту одлуку прелевмани предлужени за шейсц мешаци.
Защитна мира утаргнута за дзепоєдни файти шметанки.