НОВИ САД/РУСКИ КЕРЕСТУР – Перше прешлого тижня, 15. септембра, на ОПЕН Нови Сад, а потим и прешлей соботи, 19. септембра, на квалификацийох за Куп Сербиї за пионирох народзених 2000-2001. року, млада атлетичарка Кристина Катона з Руского Керестура освоєла златни медалї у скаканю до висока.
На першим змаганю, як младша пионирка, Катонова прескочела палїцу на висини 1,50 метери, а попри златней медалї, на ОПЕН Нови Сад достала и погар як найлєпша атлетичарка на тим змаганю у конкуренциї младших пионирох.
З Керестура на ОПЕН Нови Сад у скаканю до висока участвовала и Антония Монар, як старша пионирка, и освоєла треце место и бронзову медалю, з прескочену висину 1,45 метери.
Квалификациї за Куп Сербиї за пионирох отримани тиж у Новим Садзе, дзе Кристина Катона злєпшала свой резултат, понеже перше место освоєла з прескочену палїцу на 1,51 м. З тим виборела пласман за финалне змаганє у Купу Сербиї за пионирох, хторе початком октобра будзе у Крушевцу.
Антония Монар на истим змаганю до висока скакала з повредзеним колєном, так же прескочела 1,35 м, цо нє було достаточне за пласман на финалне змаганє.
Керестурски млади атлетичаре, народзени од 2002. по 2004. рок, на нєдзелю, 27. септембра, участвую на Першенстве Сербиї за младших атлетичарох.