Керестурски Каритас за приклад

автор маф
1k Опатрене

РУСКИ КЕРЕСТУР – Всоботу, 12. новембра, отримане традицийне Стретнуце приятельох Каритасу рускокерестурскей парохиї, хторе було у знаку 10-рочнїци вибудови Каритасового будинку у тей парохиї, а програму з молитву „Оче наш” отворел домашнї Мишани хор, под дириґенску руку Лидиї Пашо.

Коло 200 присутних привитал наш еґзарх, владика Георгий, а окреме представительох италиянского Каритасу з Удинох, хтори з найвекшей часци финансовал вибудов керестурского Каритасового дому.

Владика привитал и госцох з Каритасу з Кечкемету у Мадярскей, з хторим ше почина сотруднїцтво, предсидателя Националного Рускнацох Славка Раца, представительох церковного и дружтвеного живота и институцийох, волонтерох Критасу з других парохийох и шицких приятельох тей гуманитарней орґанизациї. Пре обєктивни причини, на Стретнуце нє могол присц беоґрадски архиепископ Станислав Хочевар, як то було наявене.

Роботу волонтерох керестурского Каритасу преосвящени владика Георгий оценєл як барз успишну, наглашуюци же його орґанизованосц и дух служа як приклад за други парохийни заєднїци у Сербиї и ширше. Присутних привитали и домашнї парох о. Михайло Малацко, як и представитель Каритасу з Удинох о. Луидї Глоацо.

На програми ше домашнї волонтере зоз словами и фотоґрафиями здогадли на початки каритативней роботи у керестурсей парохиї, дзе и на перших добротворох пароха о. Янка Копчая и владику Дионизия Нярадия, по сучасни часи – од конца 70-рокох прешлого вику по нєшкайши днї.

У уметнїцкей часци програми наступели дзеци и млади котри ше збераю, дружа и активно участвую у активносцох керестурского Каритасу, та спомнути Мишани хор, а програма закончена з поволанку приятельом Каритасу же би и далєй потримовали його активносци.

ПОВЯЗАНИ ТЕКСТИ