ЗОМБОР – Члени керестурского Здруженя паприґарох „Капсикум анум” и представителє подприємства „Юарбис” вчера були на семинаре у Едукативним центре у Зомборе, дзе им фаховци з тей установи представели тогорочни резултати хтори витворели на своїх оглядних польох зоз желєняву и совитовали их як дойсц до найлєпших резултатох у продукциї.
Госцох привитал директор Польопривредней фаховей служби у Зомборе Владимир Сабадош, котри з тей нагоди препоручел польопривреднїком же би ше почали занїмац з преробком польопривредних продуктох, а окреме паприґи, хтора у керестурским хотаре барз заступена.
Понеже на сходзе найвецей було паприґарох, интересовало их як ше бориц процив хоротох и чкодлївцох котри им спричинюю чкоди на паприґи.
Тим цо жадаю на векшим тарґовищу пласовац свою робу, фаховци совитовали же би водзели „Кнїжку поля”, хтора служи и як „дньовнїк активносцох на полю”.
Совитодавци з Польопривредней фаховей служби бешедовали и о поняцу интеґралней продукциї, та наглашели же вона заснована на наукових принципох, хтори вимагаю и участвованє фахових людзох у продукциї.
