Конєчна одлука о Планє и Програми роботи после опредзельованя средствох

автор опс
698 Опатрене

НОВИ САД – На вчерайшей 11. схадзки Управнохо одбору (УО) Заводу за културу Войводянских Руснацох розпатрани Роботне предкладанє Плану и Програми роботи Заводу у 2015. року.

Як гварел директор Заводу мр Серґей Тамаш, предложени План и Програма роботи вироятнє буду мушиц буц кориґовани, бо у идуцим року наявени рестриктивни буджет.

Вчера винєшени плановани активносци Заводу вимагаю вецей як 8 милиони динари, а прешлорочни буджет нашого Заводу бул 6 600 000 динари. Спрам опредзелєньох, за програмски активносци Завод опредзелї 55 одсто вкупних средствох хтори достанє, а 45 одсто средствох будзе потрошена за чечуци трошки и плаци занятих.

Медзи иншим, нарок плановане публиковац два мастер роботи у Едициї „Владимир Ґарянски”, предвидзене орґанизовац трибини, литературни стретнуца, фахово роботнї, прекладанє двох наших кнїжкох на українски язик, публикованє каталоґох, єден з нїх и о парохиї у Руским Керестуре, заєднїцки мултикултурални проєкти з другима заводами, плановане видаванє ЦД-ох и нотних записох.

За наиходзацу Централну програму означованя Националного швета Руснацох, початком идуцого рока у Вербаше, Завод опредзелєл милион динари.

План и Програма Заводу амбициозна, поведзене на схадзки, а конєчно буду принєшени после конкретного спознаня о висини средствох хтори ше достанє од финансиєра – орґаних АП Войводини.

ПОВЯЗАНИ ТЕКСТИ