КОВАЧИЦА – На соботу и нєдзелю, 19. и 20. септембра, у Ковачици будзе отримана роботна схадзка Координациї националних совитох (НС) националних меншинох у Сербиї. Представителє НС перше буду робиц по одборох за штири штири обласци над хторима совити маю компетенцию – за образованє, информованє, културу и за службене хаснованє язика и писма, потим и вєдно, а заключеня и вимоги Координациї буду послати до ресорних министерствох. На роботней схадзки буду присуствовац и представителє Националного совиту Руснацох.
У обласци образованя будзе слова о вирабяню правилнїка о плану учебнїкох на язикох меншинох, о потреби обезпечованя просвитних совитнїкох за наставу на меншинских язикох, о статусу мацеринского язика як виборного предмету, як и о реаґованю на утаргованє просвитних инспекторох у компетенциї АП Войводини.
Координация утвердзи и свойого представителя у Националним просвитним совиту, та стаємни состав делеґациї хтора Координацию будзе заступац у прегваркох з Министерством просвити и другима компетентнима институциями.
У обласци образованя теми буду приватизованє медийох, робота меншинских редакцийох у явних сервисох – РТС и РТВ, о вимоги Реґулаторного цела за електронски медиї (РЕМ) за преберанє Другей програми РТ Войводини за кабловских емитерох, а тиж будзе утвердзени стаємни состав делеґациї хтора Координацию будзе заступац у прегваркох з ресорним министерствох и другима институциями.
У шицких обласцох, та и у култури (з тим одбором у Ковачици будзе предшедовац Мирослав Кевежди) и обласци службеного хаснованя язика и писма, будзе ше робиц и на материялних елементох Акцийного плану за поглавє 23 у приступаню до ЕУ, а окрме и на роботней ґрупи Координациї за Акцийни план.
На нєдзелю представителє буду зашедац у пленуме, хтори буду водзиц предсидателька Координациї Ана Томанова Маканова и єй заменїк Есад Джуджо. Попри розправи о заключеньох з роботи по одборох, будзе порада и о схадзки представительох Координациї з Одбором за людски и меншински права Европского парламенту, у Беоґрадзе 24. септембра, та о нащиви представительох националних меншинох зоз Сербиї Европскому парламенту у Бриселу, 30. септембра.