КУЛА – Културно-просвитна заєднїца (КПЗ) Кула у рамикох 55. Културно-пропаґандней акциї „Мешац кнїжки” тих дньох розписала и литературни и подобови конкурси за дзеци з ПУ „Бамби” и школярох основних школох у општини Кула. Конкурси отворени по 7. новембер того року.
Циль конкурсу же би ше афирмовало креативни и талентовани дзеци у литературним и подобовим висловйованю, а у рамикох акциї на пропаґованю кнїжки, читаня, литературней и подобовей творчосци.
Литературни конкурс розписани за младши (од 3-5. класу) и старши (од 6-8. класу) возрозст основношколцох за писню и приповаедку на шлєбодни теми, хтори мож написац и на мацеринским язику.
Попри за школярох, подобови конкурс предвидзени и за дзеци у предшколскей установи, а мож посилац подобово роботи на шлєбодни теми и у шицких формох подобового висловйованя.
Подробнєйши информациї о конкурованю мож найсц на сайту Културно-просвитней заєднїци Општини Кула, (www.kpzkula.com) дзе треба и посилац роботи по 7. новембер. Шветочне преглашенє резултатох конкурсох и вистава подобових роботох будзе 4. децембра.