Мало хибело за побиду

автор а. медєши
205 Опатрене

РУСКИ КЕРЕСТУР – Подросток Фодбалского клубу (ФК) „Русинˮ прешлого тижня, штварток 21. априла, на домашнїм терену одбавел друге коло у Подручней младежскей лиґи у хторей одбавел нєришено процив екипи ФК „Гайдукˮ зоз Стапару, з резултатом 4:4 (1:3), а ґоли за Русин дали – Неманя Ковачевич 2, Александар Тома и Лука Иличич.

Перши ґол, зоз убавеней акциї, дава Неманя Ковачевич, и то було 1:0 за Русин.

После тей 30. минути по конєц першого полчасу, фодбалере Русину направели даскельо ключни гришки хтори процивнїки вихасновали, а хтори на концу Русиновцох коштали побиди.

Шицки три гришки ше случели зоз трох соло акцийох, кед нашо охранєбни бавяче нємеркуюци, пущели нападачох Стапара, хтори ше практично лєм „прешейталиˮ коло нашого ґолу.

Коло 60. минути, водство зоз 3:1 на 3:2 за госцох ознова зменшує схопни Неманя Ковачевич. Медзитим, процивнїки ознова зоз контра нападу даваю и 4. ґол.

У 80. минути, пред сам конєц, судия писка пенал за Русин, виводзи го Лука Иличич хтори премахує пенал, медзитим на лабду хтора ше одбила прибегує Александар Тома и зменшує резултатску предносц на 4:3 за госцох.

Остатнї 10 минути Русиновци нападаю ище вецей, а Иличич после премахнутого пеналу, тераз зоз 16 метерох, дава евро-ґол и виєдначує на 4:4. После виєдначованя, судия предлужує змаганє за ище 2 минути, та у тим надополнєню Русиновци мали ище єдну вельку шансу за ґол, кед Марко Ковачевич центрирал лабду зоз правого боку, а Александар Зорич у тей хвильки, у 92. минути, зоз главу могол дац и 5. ґол, медзитим лабда пошла понад горню греду.

За Русин бавели – Неманя Ковачеви, Александар Зорич, Матео Чордаш, Лука Иличич, Александар Тома, Тадей Бодянец, Алексей Бики, Божидар Чонка, Марио Иличич, Марко Попов, Теодор Няради, Андрей Дудаш, Мирко Надь, Марко Ковачевич.

ПОВЯЗАНИ ТЕКСТИ