СВИДНЇК (СЛОВАЦКА) – У Доме култури у Свиднїку вчера, 20. септембра, отримани концерт з нагоди 60 рокох шпиваня Мариї Марки Мачошковей, єдней з найвизначнєйших особох русинского фолклору, чийо шпиванє добре познате и нашей публики у Сербиї.
Концерт отримани под покровительством городоначалнїка Свиднїку Яна Голодняка, а попри „ першей дами русинскей шпиванки”, ювилантки Мачошковей, наступели и єй госци – Милан Рендош, Барбора Фецкова, Ана Порачова, Трио Свитково, Фолклорни ансамбл „Варговчан” и народни приповедач Йожка Йожко.
Мария Мачошкова народзена 30. марца 1940. року у русинским валалє Поточка у Словацкей и по законченю гражданскей школи ступела до тедишнього Поддуклянского українского народного ансамблу у Прешове, тераз Поддуклянски уметнїцки народни ансамбл (ПУНА), дзе од 1956. по 1998. рок робела и наступала як хористка и соло-шпивачка.
Мачошкова єдна з найвекших популаризаторох русинскей народней шпиванки ширцом швета, а два раз наступала и у Зєдинєних Америцких Державох – перши раз 1969. року у Нюйорку, а 2013. року на окремней турнеї по Америки.
Єй глас мож слухац на числених музичних албумох хтори видала ПУНА, лєбо други ансамбли з хторима наступала, 1985. року достала титулу „Заслужни уметнїк Чехословацкей”, а як шпивачка є активна и нєшка.