„Маткованє” у Матки

автор апа
1.3k Опатрене

Млади Руснаци у Новим Садзе ше самоинициятивно почали раз мешачно сходзиц у РКЦ (Руски културни центер), ткв. новосадскей Матки.

Друженя младих, або „Маткованя” ше отримую каждей першей стреди у мешацу. Млади, и тоти хтори ше так чувствую, нє лєм Новосадянє, алє и Руснаци зоз других местох, хтори пришли до штреднєй школи лєбо на факултет до Нового Саду, приходза до Матки же би ше упознали, черали идеї и искуства, дружели ше и, насампредз, бешедовали на мацеринским язику.

Треце по шоре „Маткованє” було 2. марца, Матка була полна, а нащивительох окрем з Нового Саду було зоз Коцура, Руского Керестура и Дюрдьова.

DSCN0013

 

Маркус Грубеня, Нови Сад:

На „Маткованя” приходзим поряднє, думам же то одлична идея же би ше млади нєформално сходзели и дружели. Матка ми миле место и любел бим ту упознац ище вецей пайташох. Видзи ше ми маме вше менєй нагоди приповедац по руски и требали бизме ше цо вецей сходзиц.

Тамара Салаґ, Дюрдьов:

За „Маткованє”, сом чула так же сом достала поволанку на Фейсбуку, понеже направени „евент”.

Треба же бизме ше цо вецей зиходзели,

єст нас наисце вельо зоз других руских местох цо студираме у Новим Садзе и чкода же ше нє тримаме вєдно. Перша стреда у мешацу праве нагода за тото.

Александар Планкош, Руски Керестур:

Першираз сом на „Маткованю”, цалком случайно сом пришол. Ходзим до штреднєй школи, и стретнул сом пайташку хтора ми гварела же приходзи до Матки, та и я пришол. Одушевело ме же пришли вельо особи з хторима ше познам. Екстра идея.

Петро Иван, Коцур:

Пайташе ме волали най придзем и нє побановал сом. Опущена атмосфера, бавели зме дружтвени бависка. Нє познам вельо Руснацох з других местох, та думам же то добра нагода же бим ше упознал зоз Новосадянами, Керестурцами…

ПОВЯЗАНИ ТЕКСТИ