На конференциї за новинарох у Заводзе за културу войводянских Руснацох у Новим Садзе, котра була 12. априла, представена нєзависна продукция Новинарскей асоцияциї Руснацох (НАР) – проєкт „Миниятури о макси темох”. Проєкт облапя шейсц рaдио емисиї на сербским язику, хтори маю за теми милитаризем, национализем, расизем, фундаментализем, фашизем и анґажована уметносц.
Емисиї буду синхронизовани на руски язик, так же будзе вкупно 12 емисиї. Циль тих тематских емисийох то же би подгадли явносц на ключни идеолоґиї и дружтвени феномени хтори означели 20. и 21. вик, як на ґлобалним уровню, так и на териториї бувшей Югославиї и Сербиї, як и їх уплїв на живот женох. Источасно, то и порив за борбу процив милитаризма, нацонализма и расизма.
Проєкт НАР финансує Реконструкция женски фонд зоз Беоґраду, а партнер на проєкту Радио Нови Сад Явней медийней установи РТВ.
На конференциї присутних привитала предсидателька НАР Мартица Тамаш, зоз констатацию же то бул тогорочни перши и успишни проєкт.
Координаторка того проєкта Анамария Ранкович наглашела же ше цеши у нїм, бо нашо новинарки указали же можу робиц комплексни теми и на сербским язику. Циль то едукованє явносци и здогадованє на тоти теми. Добре и тото же Европски рух положел тоти емисиї на свой сайт.