БЕОҐРАД – Предсидатель Сербиї Томислав Николич и предсидателька Народней скупштини Мая Ґойкович священству и шицким вирнїком котри славя Вельку ноц по григориянским календаре повинчовале тото вельке християнске швето, а предсидатель Влади Сербиї Александар Вучич вчера присуствовал на Служби Божей у католїцкей церкви у Панчеве.
– Вам и шицким вирнїком католїком жадам щешлїве швето Христового воскресеня. Най ше радосц Велькей ноци уселї до шерцох шицких котри славя побиду живота над шмерцу, а у часох спокусох най триюмфую мир, любов и толеранция – пише у вельконоцней винчованки хтору предсидатель Николич послал беоґрадскому надбискупови Станиславови Хочеварови.
– У мено Народней скупштини Републики Сербиї и особнє винчуєм вельке християнске швето, у надїї же шицких здогаднє на християнски вредносци мира, любови, толеранциї и порозуменя. Шицким гражданом котри тераз славя тото швето жадам най Велька ноц до домох принєше радосц и благостан – поручела Мая Ґойкович у винчованки.