ДЮРДЬОВ – У дюрдьовскей ОШ вчера, под час препатраня тестох хтори ришовали нашо основношколци на 6. Медзиокружним змаганю з руского язика и язичней култури, присутним школяром представена Школа „Петро Кузмяк” з Руского Керестура, односно єй руске оддзелєня Ґимназиї общого напряму.
О вигодносцох и предносцох школованя у нашей Ґимназиї бешедовали члени Националного совиту (НС) Руснацох – предсидатель Вивершного одбору Совиту Желько Ковач, членїци НС – директорка Школи „Петро Кузмяк” Хелена Пашо Павлович и предсидателька Одбору за образованє НС Мелания Римар, педаґоґ у интернату Школи Иван Медєши, та директорка дюрдьовскей ОШ Мария Тртич, як бувша школярка керестурскей штреднєй школи.
Бешеднїки визначели же, попри интернату у составе Школи, найлєпши дзешецеро школяре Ґимназиї од НС, односно його Одбору за образованє, под час школского рока доставаю стипендиї, як и же школяре котри нє з Керестура у першим року школованя маю безплатне пребуванє у интернату.
Школяре о предметох, настави, професорох и розпорядку годзинох у Ґимназиї чули и од терашнєй школярки трецей класи Ґимназиї Ребеки Планчак з Керестура, котра бешедовала и о можлївосцох за розвагу и хаснованє шлєбодного часу у Керестуре.
