МИКЛОШЕВЦИ – На Други дзень Крачуна по григориянским календаре, пияток, 26. децембра, у Дружтвеним доме у Миклошевцох отримана пригодна програма з нагоди найрадоснєйшого християнского швета, хтору орґанизовало КУД „Яким Ґовля”.
У першей часци домашнї дзеци одбавели драмску сличку „Два ангели”, хтору з нїма пририхтал Желько Лїкар, младша танєчна ґрупа одтанцовала хореоґрафию „Кошенє, грабанє, плаканє”, док рецитаторе одрецитовали винчованки и рецитациї по руски и горватски. Дзеци шпивали и даскельо коляди, а солистка Паула Поточки одшпивала „Щешлїви Нови рок”, док коляду „Цо за радосц” и „Танєц коло” одграли Денис Гарди, Матей Бурчак, Иван Лїкар, як и госц з Вербасу Микола Чизмар Коле.
Другу часц вечару у Миклошевцох збогацели госци з КПД „Карпати” з Вербасу, котри на початку виведли драмску сличку „Христос раждаєтся”, а младих ґлумцох пририхтала Нада Лендєр. Мишана шпивацка ґрупа „Карпатох” одшпивала три коляди, на ґитари их провадзел Микола Чижмар Коле, а на концу присутних домашнїх нашмеял ґлумец Янко Лендєр з виривком з монодрами Дюру Папгаргая „Илия опозиция”.
Конферансу за Крачунску програму пририхтала Ксения Лїкар мл., а водзели ю школярки Анамария Мудри и Анамария Лїкар. После програми у Дружтвеним доме за домашнїх и госцох ораґанизоване ошвиженє и друженє.
