На Медзинародним конґресу русинского язика и Руснаци зоз Сербиї

автор зам
1.1k Опатрене

ПРЯШОВ (СЛОВАЦКА) – У Пряшове, у Словацкей, нєшка, 23. септембра, почина Штварти Медзинародни конґрес русинского язика, а будзе закончени на пияток, 25. септембра. Конґрес орґанизує Институт русинского язика и култури Пряшовского универзитету, а пошвецени є 20 роком кодификованя русинского язика у Словацкей.

Шветочне отверанє Конґресу будзе на ютре дополадня, а отворя го директорка Институту русинского язика и култури др Ана Плишкова и ректор Пряшовского универзитету др Петер Коня.

Учашнїки зоз Словацкей, Канади, ЗАД, Нємецкей, Польскей, України, Мадярскей, Сербиї и Горватскей винєшу свойо роботи и викладаня на тематских панелох – о статусу русинского язика у ширшим линґвистичним контексту, актуалних линґвистичних проблемох русинского язика у поєдиних державох, о русинским язику у окремних функционалних сферох, та о русинским язику у школскей системи у Словацкей и других жемох. После дискусийох о викладаньох, на законченю будзе принєшена и Резолуция и Заключеня Конґресу.

Позарядови професор на Новосадским универзитету др Михайло Фейса, котри источашнє и у Орґанизацийним одборе Конґресу, на Медзинародним конґресу русинского язика у Пряшове участвує з двома роботами – „Линґвистични проблеми южнорусинскей вариянти русинкого язика” и „Курикулум и силабус Оддзелєня за русинситику”.

На тематским панелу о русинским язику у школскей системи з нашей жеми на Конґресу участвую педаґоґ у Ґимназиї Школи „Петро Кузмяк” у Руским Керестуре Любица Няради, котра будзе бешедовац о штредньошколским образованю на руским язику. О предшколским образованю на руским язику будзе бешедовац Емилия Костич з керестурского Оддзелєня „ПУ „Бамби”, а о двоязичним, та основношколским образованю проф. Мария Сакач Фейса, педаґоґ и Славица Чельовски, учителька, обидва з ОШ „Братство-єдинство” з Коцура, як и директрока дюрдьовскей ОШ „Йован Йованович Змай” Мария Тртич. Тему „Европске и войводянске образованє з оглядом на мултикултуралносц” на Конґресу виложи и ма Валентина Чизмар, докторантка филозофиї з Вербасу.

Шицки реферати по конєц рока у цалосци буду публиковани у окремним зборнїку наукових роботох орґанизатора Конґресу, а под час його отримованя, учашнїки нащивя представу Театру Александра Духновича, виставу русинскей литератури у Музею русинскей култури, а предвидзена и културна програма.

У рамикох Конґресу, на ютре, на вистави виданьох русинскей литератури, будзе додзелєна и Награда Кирила и Методия за розвой русинского язика, хтору того року достанє и Ирина Папуґа з Нового Саду.

 

ПОВЯЗАНИ ТЕКСТИ