На Медзиокружним змаганю з руского язика и промоция керестурскей Ґимназиї

автор  зам
852 Опатрене

ДЮРДЬОВ – После змаганя, односно виполньованя тестох на ютрейшим Медзиокружним змаганю з руского язика и язичней култури за школярох основних школох, у Дюрдьове будзе отримана и промоция Ґимназиї, єй руского оддзелєня, односно штреднєй школи у Руским Керестуре.

Промоция пре уписованє школярох з наших местох до єдиней нашей штреднєй школи будзе од 12,30 до 14,30 годзин, под час препатраня тестох хтори буду ришовац школяре-учашнїки на Медзиокружним змаганю, дознава Рутенпрес од предсидательки Одбору за образованє Националного совиту (НС) Руснацох Меланиї Римар. Як гварела Римарова, промоцию после спомнутого змаганя у Дюрдьове ше орґанизує же би ше вихасновало присуство найлєпших школярох з наших местох дзе ше виучує руски язик, а котри потенциялни школяре керестурскей Ґимназиї.

Ютрейше Медзиокружне змаганє з руского язика и язичней култури у ОШ „Йован Йованович Змай” у Дюрдьове почнє на 9,30 г., а участвує 71 школяр од пиятей по осму класу з 19 школох, односно 13 местох дзе ше на даяки способ виучує руски язик.

Медзиокружне змаганє з руского язика и язичней култури орґанизую Министерство просвити, науки и технолоґийного розвою, Дружтво за руски язик, литературу и културу и ОШ „Йован Йованович Змай” у Дюрдьове, а промоцию керестурскей Ґимназиї Одбор за образованє НС Руснацох и Школа „Петро Кузмяк”.

 

ПОВЯЗАНИ ТЕКСТИ