ДЮРДЬОВ – На вчерайшим 6. Медзиокружним змаганю з руского язика и язичней култури школярох основних школох, хторе отримане у ОШ „Йован Йованович Змай” у Дюрдьове, участвовал 71 школяр од пиятей по осму класу з 19 школох з 13 наших местох.
Зоз школох дзе ше руски язик виучує у порядней настави – з Руского Керестура, Коцура и Дюрдьова участвовали 46-еро школяре, як и 25-еро з тринац школох дзе ше руски язик виучує як виборни предмет – з Нового Саду, Ветернику, Сримскей Каменїци, Бачкей Тополї, Нового Орахова, Вербасу, Кули, Бачинцох, Савиного Села и Сримскей Митровици.
У конкуренциї школярох котрим руски у порядней настави, тести найлєпше поробели школяре осмих класох, понеже зоз 14-ерих седмеро завжали перше место, а були успишни и школяре седмих класох, бо з 12-ерих тиж седмеро освоєли перше место. Медзи 10 школярами шестих класох штверо завжали перши штири места, а медзи 10 школярами пиятей класи, нє було освоєного першого места.
Школяре котри руски язик виучую як виборни предмет були подзелєни до двох ґрупох. У ґрупи пиятих и шестих класох змагали ше осмеро, и єден школяр освоєл перше место, а у ґрупи школярох зоз седмей и осмей класи було 17 змагательох и перше место завжали осмеро школяре.
На Републичне замаганє, хторе 21. мая будзе тиж у Дюрдьове, пласовали ше, як то по пропозицийох, школяре седмих и осмих класох, вєдно 40-церо – 25-еро з порядней и 15-еро школяре котрим руски язик виборни предмет.
Шицки школяре достали кнїжки и припознаня, хтори им уручели директорка дюрдьовскей ОШ Мария Тртич и Ирина Папуґа спред єдного з орґанизаторох Змаганя – Дружтва за руски язик, литературу и културу.
Медзиокружне змаганє з руского язика и язичней култури отворели предсидатель Вивершного одбору Националного совиту (НС) Руснацох Желько Ковач и Ирина Папуґа, як и директорка дюрдьовскей Школи Мария Тртич и домашня наставнїца руского язика Мария Самарджич.
На Змаганю присуствовали и предсидателька Одбору за образованє НС Мелания Римар, директорка керестурскей Школи Хелена Пашо Павлович, директор Заводу за културу войводянских Руснацох Серґей Тамаш, др Юлиян Рамач и Владимир Салонски спред Дружтва за руски язик, литературу и културу и наставнїки руского язика з наших местох.
Змаганє орґанизовали Министерство просвити, науки и технолоґийного розвою Влади РС, Дружтво за руски язик, литературу и културу и ОШ „Йован Йованович Змай” у Дюрдьове.
