РУСКИ КЕРЕСТУР – На вчерайшей схадзки Програмного одбору Фестивалу рускей култури „Червена ружа” винєшене же на тогорочней 54. „Ружи” буду виведзени найвироятнєйше 28 нови композициї наших авторох – 16 за дзеци и 12 забавни, а ище вше тирва приявйованє шпивачох з наших местох за змаганє за найкрасши дзивоцки и леґиньски глас.
Як прешлого тижня порадзене на Орґанизацийним одборе, Фестивал рускей култури будзе од 26. по 28. юний у керестурскей Школи, а почнє з отвераньом вистави подобових роботох академского уметнїка Милана Колбаса з Ветернику. Исти дзень, пияток, 26. юния, будзе отримане и „Червене пупче”, а як гварене на схадзки Програмного одбору, приявйованє дзецинских ансамблох з наших КУД тирва по 1. юний.
Програмни Орґанизацийному одбору предложи же би на Шветочним концерту, на соботу, 27. юния, попри побиднїцких точкох з наших музичних фестивалох, та хору и танєчних ансамблох з Керестура, участвовал и танєчни ансамбл КУД „Тарас Шевченко” з Дюрдьова, а госцуюци Фолклорни ансамбл ПУЛС зоз Словацкей будзе мац блок до 50 минути. После Шветочного, будзе и Естрадни концерт, а його змист маю предложиц млади з „Пакту Рутенорум”.
За змаганє за найкрасши глас за тераз приявени 14-еро млади шпиваче, алє ше обчекує же их будзе до 20 и тих дньох будзе пошвидшане їх приявйованє з наших местох. Шпивачох на змаганю за кошарку червених ружох и чобольов, та виводзачох нових забавних композицийох на фестивалским вечаре, на нєдзелю, 28. юния, буду провадзиц Вельки народни оркестер керестурского Дому култури и Фестивалски забавни оркестер.
На вчерайшей схадзки Програмного одбору бешедоване и о авторох и водительох конферансох на манифестацийох „Ружи”, як и о других детальох вязаних за програми Фестивалу.