ДЮРДЬОВ – Даскельо днї пред Крачуном, дюрдьовска церква Рождества Пресвятей Богородици достала два нови столїки за дзиякованє, односно крилоси.
Крилоси, у хторих ше трима литурґийни кнїжки, виробел Сима Будиша, резбар и власнїк ателєу „Святи Трифун” з Тителю. Вон виробел и резбариї на иконостасу у дюрдьовскей церкви.
Пенєж за тоту намену, коло 360 000 динари, обезпечени з прешлорочного конкурсу Покраїнского секретарияту за образованє, предписаня, управу и национални меншини-заєднїци, за церкви и вирски заєднїци у Войводини.
З тих средствох виробени и столїк на штред церкви на хтори ше кладзе пригодни образ на швета, а тераз є у нашей церкви у Ґосподїнцох.